၁၉၄၈ ခုနှစ် ဇန်နဝါရီလ ၄ ရက်နေ့တွင် မြန်မာနိုင်ငံသည် ဗြိတိသျှကိုလိုနီလက်အောက်မှလွတ်မြောက်ခဲ့ပြီး လွတ်လပ်သည့် နိုင်ငံတစ်နိုင်ငံအဖြစ် ရပ်တည်နိုင်ခဲ့သည်။ ထို့ကြောင့် နှစ်စဉ် ဇန်နဝါရီလ ၄ ရက်နေ့တိုင်း ဦးတည်ချက်ကောင်းများဖြင့် ကျင်းပလာခဲ့သော နေ့ထူးနေ့မြတ်တစ်ခုသည် ယခုနှစ်တွင် (၇၈)နှစ် ပြည့်မြောက်တော့မည်ဖြစ်သည်။

ပြီးခဲ့သည့်နှစ်များအတွင်း တရုတ်ပြည်သူ့သမ္မတနိုင်ငံ ဟိုင်နန်ကျွန်းဟိုက်ကုမြို့၌ အခြေစိုက်သည့် တရုတ်နိုင်ငံပြုပြင်ပြောင်းလဲရေးနှင့် ဖွံ့ဖြိုးရေးတက္ကသိုလ် (China Institute for Reform and Development-CIRD)က ကျင်းပသည့် ဆွေးနွေးပွဲများသို့ ပါဝင်တက်ရောက်ခွင့်ရခဲ့သည်။ ယင်းဆွေးနွေးပွဲများမှာ ပါတီပိုင်းဆိုင်ရာအကြီးအကဲများ၊ ဒေသအာဏာပိုင်များ၊ နိုင်ငံတကာမှပညာရှင်များ၊ မူဝါဒပိုင်းဆိုင်ရာပုဂ္ဂိုလ်များ အများအပြား ပါဝင်တက်ရောက်သည့် တရုတ်နိုင်ငံ ၏ ပြုပြင်ပြောင်းလဲရေးဆိုင်ရာဆွေးနွေးပွဲများ ဖြစ်ပါသည်။

မိမိတို့နိုင်ငံသည် ဖွံ့ဖြိုးဆဲနိုင်ငံတစ်နိုင်ငံဖြစ်သည့်အားလျော်စွာ အားနည်းနေသေးသော စီးပွားရေးကို ပြန်လည်ဦးမော့လာအောင် ကြိုးစားရုန်းကန်ရမည်ဖြစ်သည်။ တည်ငြိမ်မှုနှင့် ဖွံ့ဖြိုးတိုးတက်မှုဟူသည် အပြန်အလှန်ဆက်စပ်မှုရှိသည့်အတွက် စီးပွားရေးတိုးတက်မှလည်း နိုင်ငံတည်ငြိမ်မည်ဖြစ်သည်။ ထို့ကြောင့် စီးပွားရေးဖွံ့ဖြိုးတိုးတက်ရန်အတွက် နိုင်ငံတော်က ဦးတည်ချက်များ၊ စီးပွားရေးမူဝါဒများ၊ စီမံကိန်းများ အစဉ်တစိုက်ချမှတ်၍ နိုင်ငံ၏ စီးပွားရေးကို မြှင့်တင်ပေးလျက်ရှိရာမှာ အသေးစား၊ အငယ်စားနှင့် အလတ်စားစီးပွားရေးလုပ်ငန်းများ (Micro, Small and Medium Enterprises-MSMEs) သည်လည်း ကဏ္ဍတစ်ခုအနေဖြင့် ပါဝင်ပါသည်။

နိုင်ငံတော်ဖွံ့ဖြိုးတိုးတက်စေရန် ဖြည့်ဆည်းရမည့် လိုအပ်ချက်များစွာရှိသည့်အနက် နိုင်ငံအတွင်းရှိ လူ့စွမ်းအားအရင်းအမြစ်များအတွက် ပညာရေးကို အားပေးမြှင့်တင်ရန်မှာ အဓိကကျသည့် အချက်တစ်ချက်အဖြစ် ပါဝင်ပါသည်။ နယ်လ်ဆင်မင်ဒဲလားက ပညာရေးနှင့်ပတ်သက်၍ “ကမ္ဘာကြီးကို ပြုပြင်ပြောင်းလဲဖို့ အစွမ်းထက်ဆုံးလက်နက်သည် ပညာရေးဖြစ်သည်” ဟု မိန့်ဆိုခဲ့ပါသည်။ ပညာဆိုသည်မှာ အကြောင်းအကျိုး၊ အကောင်းအဆိုးကို ခွဲခြားပြီး သိတတ်သော သဘောတရားဖြစ်ပါသည်။ ပညာသည် အမျိုးမျိုးခွဲခြားသိတတ်သည်ဆိုရာ၌ အာရုံများ၏ သဘောအတိုင်း အမှန်မပေါ်စေရန် မှောင်ချဖုံးအုပ်ကွယ်ကာထားသော မောဟဟုခေါ်သည့် အဝိဇ္ဇာတရားကို ဖယ်ရှားကာ အမှန်အတိုင်းထိုးထွင်း သိတတ်သောလက္ခဏာရှိပါသည်။